canti e inni calabresi

BONASIRA....
(antica melodia di Oppido Mamertina)

Bonasira Vi dicu a Vui, Madonna,
la gloriusa di Santa Maria. (due volte)

Mu ndi ncumpagna la notti e lu jornu
e puru quandu jimu pe' la via. (due volte)

A la matina: bongiornu, bongiornu,
Vui siti Patruna di tuttu lu mundu. (due volte)

Guardu a l'artari e nc'è na gran Regina,
Maria da Nunziata ca si chiama. (due volte)

A cuji nci cerca grazji nci duna,
a li malati lu cori nci sana. (due volte)

A li malati lu cori nci sana,
a l'orfaneji la ventura nciuna. (due volte)

E jeu, Madonna, Vi ndi cercu una:
st'arma cuntenta e la mè vita sana. (due volte)

Jeu mi ndi vaju in celu e ja v'aspettu,
e se non siti peccaturi ngrati. (due volte)

Vi dugnu tuttu chiju chi vuliti:
lu Paradisu se lu meritati. (due volte)

E la Madonna si vota e ndi dici:
vajiti, bonasira e santa pace. (due volte)

E mo' si parta Maria
(canto di Scalea - Cosenza)

E mo' si parta Maria
Cu' na gran compagnia,
Aduramula e sempre sia di lu Carmini Maria.

E mo' si parta Maria
Cu' na gran compagnia,
E lassatimi passà ca la voglio salutà.

E giram intornu intornu
Alla cappella di la Madonna,
Ca ci spanna lu mantu
E ci raccoglia a tutti quanti.

Si Maria non avia lu mantu
Ieramu persi tutti quanti,
Aduramila e sempre sia di lu Carmini Maria.

E quantu jè bellu 'stu mantu,
Jè stillato intorno intorno
Eoji ch'è lu to' giorno,
Oh chi festa chi sarà!

         E oji ch'è la festa di la to' cappella,
         Vergine bella, consolami tu!

E giram intornu intornu
Alla cappella di la Madonna,
La cappella l´amu girata
E la Madonna l´amu truvata.

E noi siamu venuti
a cercari conforti
E sbannannilli 'sti porti
Ca noi vogliamo trasì.

E dà intra a 'sta cappella
C´è Maria ch' è tantu bella,
Ca leggia e ca scrivia
E lu bambinu in brazza tinia.

All'una di li stelli
Escioglitilli 'sti biondi capelli
Ca su' fatti anelli anelli:
Evviva Maria e quantu si bella!

A li dui di li stelli
E sciogliatilli 'sti biondi capelli
Ca su fatti anillati anillati,
Evviva a Maria e chi la criata!

       E l'ha criata lu cori 'i Gesù,
       Madonna du Carmini, aiutami tu!

A li tri di li stelli
Esciogliatilli 'sti biondi capelli,
Ca su' fatti anelli anelli:
Evviva a Maria e quantu si' bella!

A li quattru di li stelli
E sciogliatilli 'sti biondi capelli,
Ca su' fatti anillati anillati:
Evviva a Maria e chi l'ha criata!

       E l'ha criata lu cori 'i Gesù,
       Madonna du' Carmini, aiutami tu!

A li cincu di li stelli
Esciogliatilli 'sti biondi capelli,
Ca su' fatti anelli anelli:
Evviva a Maria e quantu si bella!

A li sei di li stelli
E sciogliatilli 'sti biondi capelli,
Ca su fatti anillati anillati:
Evviva a Maria e chi l'ha criata!

       E l'ha criata lu cori 'i Gesù,
       Madonna du' Carmini, aiutami tu!

A li setti di li stelli
Esciogliatilli 'sti biondi capelli,
Ca su' fatti anelli anelli:
Evviva a Maria e quantu si' bella!

A li ottu di li stelli
E sciogliatilli 'sti biondi capelli,
Ca su' fatti anillati anillati:
Evviva a Maria e chi l'ha criata!

       E l'ha criata lu cori 'i Gesù,
       Madonna du Carmini, aiutami tu!

A li novi di li stelli
Esciogliatilli 'sti biondi capelli,
Ca su fatti anelli anelli:
Evviva a Maria e quantu si' bella!

A li dieci di li stelli
E sciogliatilli 'sti biondi capelli,
Ca su' fatti anillati anillati:
Evviva a Maria e chi l'ha criata!

       E l'ha criata lu cori 'i Gesù,
       Madonna du Carmini, aiutami tu!

Aggiu fattu tanti trapazzi
Per godere le tue bellezze
E con te vorrei morire
E sulle tue braccia vorrei spirar!

A li piedi di la Madonna
E c´è nata 'na bella rosa,
È 'na rosa inargentata:
Evviva a Maria e chi l'ha criata!

    E l'ha criata lu cori 'i Gesù,
    Madonna du Carmini, aiutami tu!

    Tu sei la rosa dell´alma più bella,
    Mi sembri una stella e una fiamma d´amor.
    Maria risponde: Io so' regina!
    E Madre divina, tu prega per me!

A li piedi di la Madonna
E c´è nata 'na bella rosa
E li stilli intorno intorno
Fanni 'na grazia, ohi Madonna!

         Ca ti la chiedo po' cori 'i Gesù,
         Madonna du Carmini, aiutami tu!

Maria Carmelitana,
D´ogni grazia tu si' funtana,
Ogni grazia ca vulimu
A Maria ndi rivulgimu!

Ohi Madonna,
Ca in cielu tu si' colonna
E ca in terra tu si' funtana,
Rispunnimi quannu ti chiamu!

Pi' mari e pi' terri si' numinata,
Tu, o Madonna di lu Carminu,
Si' piena di virtù!

E stendammillu 'stu bracciu
E porgimmilla 'sta manu
E si ci poterà parlà,
Oh chi gioia chi sarà!

Caminu via via
E viju n´umbra appressu a mmia
E mi criju ch'è Maria,
Ca mi veni accumpagnà.
E sonamu li campanelli
ca Maria veni da Roma
e cu' setti verginelli,
tutti e setti cu' 'na curona.

E mo' si ricogli Maria
Cu' 'na grandi compagnia,
Aduramula e sempre sia
Di lu Carmini Maria!

Oh Madonna, ca mi ndi vaju
E non sacciu si jeu tornu,
E se jeu non tornu cchiù
Tu non ti scordari di me!

Oh Madonna ca mi 'ndi vaju
E non sacciu chi t´aju a diri,
E ti dicu 'n´Ave Maria
Statti bona, Madonna mia!

(Questo canto veniva cantato durante la processione della festa della Madonna del Carmine)

Ndava tri notti...
(canto di Monasterace - Reggio Calabria)

Ndava tri notti chi on pigghjiu sonnu
ca sant'Andria mi vinna a risbigghjara.
"Risbigghjati de sonnu e on dormira,
li strati 'e Monesteraci devi fara;
e 'nta la chjesi mia devi venira
e lu Rusariu meu devi cantara."

E lu cantamu cu na randa fidi
ca sant'Andria 'nda iuta e ni provvidi.

Quandu mi sentu tribulatu assai,
o sant'Andria Avellinu, chjamu a Vui!
E va dincillu allu Maestru toi
ca li bisogni mei Tu già li sai.

Lu vostru nomu a mia mi piacia assai
ca lu patra de tutti siti Vui.

E on mi movu dalli pedi toi
si on viju la grazia chi mi fai.
O sant'Andria Avellinu, Vui prigati
ca nui facimu chidu chi vuliti.

(Questo canto di Minasterace è dedicato al compatrono SANT'ANDREA AVELLINO, che si festeggia il 12 maggio e il 10 novembre)

Li belli festi e li belli Natali
(canto di S. Martino di Taurianova e di Jatrìnoli)

Li belli festi e li belli Natali
su' veri ca nescìu nostru Signuri,
'nta 'na capanna a mmenzu du' animali,
Maria cu' San Giuseppi 'ndinocchjuni.

Furu stupìti chidi foritani
chi si trovaru chida notti fora:
vìttaru 'a primavera naturali,
cchjù chi ad aprili e màju cu' li fiori.

Si mìsaru 'n caminu li signori,
si mìsaru a sellari li cavadi;
li vitturini ch'èranu davanti,
chidi 'ndavìanu bonu sentimentu;

ìanu cu' fidi ferma assai costanti,
passaru dà d'Erodi tradituri.
Erodi chi li vozzi addimandari:
"Adduvi jìti vui, grandi signuri?".

(Magi) "Jàmu ch'è natu 'u nostru generali,
ch'è Re supra ogni atra criatura".

(Erode) "Jìti se lu potiti ritrovari,
c'a mmia mi fati 'nu grandi favori,
ca puru jeu lu vegnu a visitari,
ca vògghju mu lu stimu assai di cori".

La stella chi guidava a Betlemme
po' si fermàu e trasìru 'nta capanna;
da' testa si cacciaru la curuna,
ci appresentaru chidi tri regali:
l'oru, l'incenzu e a mirra a lu Signuri.

Lu Bombinuzzu vòzzaru lodari
ch'era nesciutu 'nta grandi fridduri.
La Madonna li vozzi cunzulari,
trasìru 'n grazia di nostru Signuri.

Si vìtti Erodi lu tempu passari,
cuntra si la pigghjàu di chisti 'gnuri:
fici cacciari 'n'òrdini reali
mu 'nci tàgghja la testa 'e criaturi.

Pòvari mammi affritti e patri amari,
chi gran spaventu e chi grandi torturi,
vidìri 'e fìgghj la testa tagghjari:
cunsiderati, vui, quanti doluri!

Nc'era 'na sèggia di focu 'mpernali
avanti di Lucìferu maggiuri,
e pe' spujìri la mala occasioni
fujìru in Egittu cu' nostru Signuri.

Sulu 'na grazia jeu vegnu a cercari:
chida chi dàstivu a lu bonu latruni!

(Questo antico canto natalizio è stato raccolto da Domenico Caruso, a cui è stato riferito dalla sig.na Teresa Scappatura, sorella di don Pasquale Scappatura, che dal 1974 al 1984 fu parroco di San Martino di Taurianova)

“Rosari” di S. Giuseppe
(canti di S. Martino di Taurianova)

San Giuseppi meu, Patri dilettu,
veniti a la me’ casa ca V’aspettu;
a la me’ casa vògghju mu veniti,
a li bisogni me’ mu succurriti!

San Giuseppi di la carni umana,
spusu di la gran Vergini Maria,
Vu’ gràzzii cuncediti ‘sta simana:
riparu grandi pe’ la casa mia!

San Giuseppi chi siti lu Patri,
siti Vìrgini comu la Matri;
Maria la rosa, Giuseppi lu gigliu:
dàtindi aiutu, riparu e consigliu!

‘Ssu Bambinu chi portati ‘n brazza,
cuncedìtindi ‘na gràzzia:
cunceditimmila a mmia
avanti chi sona l’Avi Maria!

San Giuseppi, non nd’abbandunati

a li bisogni e a li nicessitati.

Sia lodatu (lu) sempri sia

lu nomi di Jèsu, Giuseppi e Maria!

Un tempo a S. Martino di Taurianova, durante la novena di preparazione alla festa di S. Giuseppe, in alcune vie i fedeli allestivano degli altarini, presso i quali eseguivano dei canti con la “coroncina del rosario”.
I tre “Rosari” qui presentati furono raccolti negli anni ’50 da Domenico Caruso e pubblicati nel volume
“Storia e folklore calabrese”.

Comunione

A' Madonna da' Muntagna

'Na manu sup'a 'll'atta e Tu,
quantu pìcciulu Ti fai.
Bontarusu mi stai 'nto parmu da' manu.
Misteru Divinu: Spirutu Santu,
DIU
Tu, Gesù Bambinu.

Testo di Mimmo Staltari, musica di Camillo Berardi.

Sup’Asprumunti c’è ’na gran Signura,
Maria di la Muntagna esti chiamata:
jèu mu’ l’arrivu no’ cci vìju l’ura
e no’ mi stancu di la caminata.

E comu i nostri patri sonu e cantu,
’u cori ’n manu a’ Vèrgini presentu
e no’ mi movu di lu locu santu
se no’ si poni fini o’ me’ tormentu.

Rit.: Matri adorata, no’ m’abbandunati
       ca’ li bisogni me’ Vu’ li sapiti,
        vògghju gridari pe’ tutti li strati:
        “Veniti genti e di prèju ciangiti!”

Rigina chi lu Celu cumandati,
la paci sulu Vu’ potiti dari:
pecchì pentutu su' di li peccati,
li Vostri gran virtù vògghju lodari!

E quandu a la me’ casa jèu ritornu
mi sentu veramenti ricriari
e pregu la Madonna notti e jornu
pe’ li figghjòli e li perzuni cari.

Testo di Domenico Caruso, musica di Camillo Berardi

Per ascoltare il canto
https://www.youtube.com/watch?v=U9sHw7fzJ_c

O’ Bambinu Gesù

Bambinuzzu me' dilettu,
tantu tempu chi t'aspettu;
o Bambinu me' adoratu,
'nda lu cori t'ho portatu.

Ora vegnu mu ti trovu,
la preghera mu rinnovu:
"No' m'abbandunari cchiù,
o me' caru bon Gesù!".

Testo di Domenico Caruso, musica di Camillo Berardi.

Ringraziamenti per la collaborazione a Giuseppe Princi, Giuseppe Spagnolo, Domenico Caruso, Gigi, Camillo Berardi